Rev 16 | BEF | STEP | Ya hulago sipi mono nohi komopa'aguti nogo'a sipi mone limigo keheli'ohuna. Nogo'auba agelo 7 ya'amagihi ma luto lu epi'ehina: Lenali bite lape'i 7 ya'magu li hekinogo Hu'mamofihi ita bise'na yamofihi melugu limilibe.

Revelation of John 16

Lapeluguti hekito Hu'mamofihi ita bise'na limi'ehinamofihi ka'a

1 Ya hulago sipi mono nohi komopa'aguti nogo'a sipi mone limigo keheli'ohuna. Nogo'auba agelo 7 ya'amagihi ma luto lu epi'ehina: Lenali bite lape'i 7 ya'magu li hekinogo Hu'mamofihi ita bise'na yamofihi melugu limilibe.

2 To agelo kohe to'ehinauba ai buto lape'a ya'ma lito li hekigo melugu limi'ehina. Limito ligo bona'i enali'i akafu yagakafa ai omihi lito mino'ehina'a to ai fayaha'alo enalapusa fi emite nehana'a enali kana'ani sipi huto huloto usegehi enohoto enagabu gigo sipi keke'i lite mine'ahana.

3 To agelo napa 2 ai ya'ma lape'aguti ana'ina lito hekigo hege nagamilugu limito folo'ehina. Nofalago hege nagami'i ya'ma kene'magihi gola tegi nagami'i lolo nohigo hege nagamilugu kafa'nama silaga'i fili su he'ahana.

4 Fili su nehago agelo napa 3 ai buto lape'aguti ana'ina lito he'migo asaga biya nonuhu nagamitoga yege yege ipi opoho nagamilugu limilago gola nogo nagami'i lolo hu su ho'ehina. 5 Lolo hu su holago agelo mone'i nagamito kaba he'metoga mino'ehina ai ma luto Hu'mamofihi lu emigo keheli'ohuna: Kai hetofa bo koyapa'i mino'ahata to yatai nomina bo nohane. Pa sose minoto henetinogo minalube'mu hane. Kai kosele nasana ya'ma huto pa solatana li sibina huse'na meni'ina suhi huto huto nohibe. 6 Kai Hu'mamofihi bona'a to mono ka leli'ali bona'a enali golahi li sibi hi'ahanamofihi li legege huto epilago nenabe. Foipa nasana li'ahanamofihi nona'a ya'ma osahi suhi noepilata bati huto noepine. 7 Ya luto noligo mamufa gilata hitaloti agelomofihi bagaguti ka mone ma luto ligo keheli'ohuna: Sipi Bo, Hu'mau enebe ligi'ahata amuya bouba foipa bona'magihi ka'ani loko hilata bati huto ni'ina lama'na ka lilatamo ni'ibe.

8 Ya hulago agelo napa 4 ai lape'aguti ana'ina li hekito he'milago yegemofihi komopa'agu limito bu su hago Hu'mau lu laga mehu'ehinagi yege sipiloto bona'i lobe botobe huto lalibe luto keheliloto ya hu'ehina'mu ni'ibe. 9 Ya hulago bona'magihi yegemofihi bamu'i yauba lobe bemigibe higo gumi'i lise nasana lolo hu'ehina'a Hu'mamofihi ai ka'alo lose'na ya suhi huto huto nohina bomofihi gi'a li sibi saba hite li'ahanaya komopa'ani li gelehe mehi'ahana. To li gelehe hite Hu'mamofihi hofa tose'na'a le'mo eto mehi'ahana.

10 To agelo napa 5 ai lape'aguti ana'ina ya'ma akafu yagakafamofihi kefa hisalo hekigo limi'ehina. Limilago ai'a kapo'alo ya'ma metepu sipi gito mino'ehina. Ni'igo bona'i enali keke bake lite nehago enabagalo heni kofite mine'ahana. 11 To usegehi enahago to enagabu gise'namu'i kokulumagu Hu'mamofihi ka lu sibina sabana hi ete'ahana. Ya nehite komopa'ani mone li gelehe mehi'ahana. To lolo hite melete hi'ahana foipana'ani hiti pa sete mehe'mi'ahana.

12 Ya hulago agelo napa 6 ai ya'ma lape'aguti ana'ina li heki he'migo nagami olopa gi'a Yufalati yabe lilata nehana nagamilugu limilago nagami'i ya'ma asaga'i se'no su nohago yege tina'aga limina'agati enikibina bona'i henetilabe luto yamofihi kapo'a huto hu'ehina. 13 Ya hulago nani bu go'ohugo hagulu osifa'mofihi baga'aguti to akafu yagakafamofihi suhi huto baga'aguti to faga faga mono ka loli'ali bo ai baga'aguti foipa fele loebe monebe solo tegi enokaba gilise'na ti'ahana. 14 Enali ya'ma Satahi pana'alobomagihi ya'ma felemagi topa hose foya nasana lilata yamofihi amuya lite minete ya'ma noto noto bona'magihi kibina bo'animofihi go'na bilago Hu'mau sipi amuya bomofihi ai malalina kana'a sipilo li nupa nehite luba filune'mu habe.

15 Kehelilo. Nani gumina baukalo bona'magi suhi huto topa nehenogo henetiluna'mu yabe. Ya nehinogo luga'amagi enali enugufa yapako minalanamagi ya'ma enubuya hu laligi komopa'ani kosaba hinogo minete gukete ikolo bi etete kaba hite minalana enali enegelo bilune'mu habe.

16 To foipa felemagi enali hepa'i mone gi'a Yuta bona'magihi kaguti Hamaketoni yabe lite gi mele'ahana yalo kibina bo'animagi enali hiti yagapana'ani gonamu tamu'a Hu'mamofihi luba sabo hilabe luto enele'mo tulu hu'ehina.

17 To agelo napa 7 ai lape'aguti ana'ina gumi'i hose nasana ya'ma lito hokolo kapogu meyaga heki he'migo limi'ehina. Nolimigo sipi mono nonugu sekele mamu'a hiti kefa hisa ni'inagati nogo sipi moloto ma luto lulago limi'ehina: Heki he'mito ya'ma kana'a asu ho'ehibe. 18 Ya luto noligo kopisi'na hiti to kokililika hiti to nogo sipi yauba hekili huto mino'ehina. Nohigo imima'i sipi ya'ma noligo bu go'ohuna ya'ma bona'magihi kana'ani metoga huto hina kanaguti imima'i sipi mone ya suhi huto huto higo be megota suhi huto hu'ehina. 19 To ya nohigo ya'ma sipi hepa'i Bebiloni hepa'i ya'ma fi tili tele nohigo loko hu loebe monebe hu'ehina. To noto noto bona'magihi asaga hepa'i sipi'ani ya'ma libe tele bibe hu'ehina. To Bebiloni hepa'i sipimofihi afo'agihi enali kumu Hu'mau ai aku ekesa keheliloto ekesa nagami tegi huto ita bise lape'aguti epiloto enele'mo mikili halabe luto ligo mikili he'ahana. 20 To hege nagamilugu me'i ti'ehina'a to kosa ni'ina silaga'i loko su hago fenene hu'ehina. 21 To kokulumaguti ko'mofihi nogoya'a ko'mopa sipi efahi sipi keta'a hiti mo'nuhi tegi huto limito bona'i ibe tigibe huto i'ehina. Noigo hogisopa legeya'a yauba babu luto ibe tigibe huto enoho'ehina'mu yabe lite Hu'mamofihi lu sibina sabana hi ete'ahana.